RUS
SMARTNEWS.KZ басылымының хабарлауынша, Қазақстанға Таяу Шығыстағы жағдайға байланысты босқындар келуі мүмкін бе? Бұл сұраққа ҚР Сыртқы істер министрлігінің ресми өкілі Айбек Смадияров 2025 жылғы 23 маусымда өткен брифингте жауап берді.
"Қазіргі таңда Қазақстанға босқын мәртебесін сұрап, Иран не басқа елден келіп жатқан ешкім жоқ. Бізге ешқандай ресми өтініш түспеді", – деді СІМ өкілі.
Ол босқындар тасқыны немесе жаппай көшу қаупі жайлы нақты дерек жоғын айтып, жағдайдың қалай өрбитінін болжау мүмкін емес екенін жеткізді.
"Бізге тек бақылау жүргізу және қажет болған жағдайда әрекет ету құқығы берілген. Бір сағаттан кейін не болатынын дөп басып ешкім айта алмайды", – деді Смадияров.
Сонымен қатар, босқындар легі аясында елімізге лаңкестердің ену қаупі жөніндегі сұраққа жауап бере отырып, бұл мәселемен Ішкі істер министрлігі айналысатынын нақтылады.
Смадияров әлеуметтік желілерде тараған Газа секторының тұрғындарын Сауд Арабиясы Қазақстанға көшіру туралы фейк ақпаратты да жоққа шығарды.
"Бұл – еш негізі жоқ, ашық фейк. Мұндай шешім қабылданған жоқ", – деді СІМ өкілі.
Айта кетейік, 2025 жылдың 13 маусымында Израиль «Арыстан ұлты» операциясы аясында Ирандағы ядролық және әскери нысандарға соққы берді. Артынша Иран Израильге қарсы жауап шабуыл жасады. Осы жағдайдан кейін 22 маусымда ҚР Сыртқы істер министрлігі Таяу Шығыстағы ахуал бойынша ресми мәлімдеме жариялады.