RUS
SMARTNEWS.KZ басылымының хабарлауынша, «Құрмет» орденінің иегері, белгілі әнші Алтынай Жорабаева соңғы кезде әншілердің қайда барса да мобилографпен бірге жүруін сынға алды. Бұл туралы ол өзінің әлеуметтік желідегі парақшасында жазды.
«Осы мобилографпен жүретін жандар! Қатты шектен шықпаңыздаршы, өтініш. Құран оқитын жер болсын, той болсын – үнемі бірге жүреді. Қонаққа барсаң, тіпті амандасқаныңа дейін, сыйлық бергеніңе дейін түсіріп жүреді. Жаман көрінеді. Шын айтамын», – деді әнші.
Өнер иесі бұл әрекет халыққа көрінбегенімен, сырт көзге тым жасанды және ұнамсыз әсер қалдыратынын ескертті.
«Бәрі «ел көрсін» деген оймен істелгені сезіледі. Жарайды, жұмысыңызды, өнеріңізді насихаттаңыз, бірақ шектен шықпаңыздар. Артық айтсам, кешірім сұраймын», – деп түйіндеді Жорабаева.
Осы тақырыпқа орай бұған дейін Сәкен Майғазиев те ұлының тойында мобилографтарды ішке кіргізбегенін мәлімдеген болатын.
«800 қонақты басқару оңай емес. Оның ішінде 100 шақтысы – әріптес әншілер. Егер әрқайсысы жеке мобилографпен келсе, жағдай қиындап кетер еді. Сондықтан ұйымдастырушылар олардың кірмеуін сұрады», – деген еді эстрада жұлдызы.
Қазір желі қолданушылары арасында мобилограф мәселесі қызу талқылануда. Бірі бұл қадамды жеке кеңістікті қорғау деп қабылдаса, енді бірі заман талабына сай контент жасаудың бір бөлігі екенін айтып, қарсы пікір білдіруде.