RUS
SMARTNEWS.KZ басылымының хабарлауынша, Жоғарғы сот «Біз біргеміз» қайырымдылық қоры арқылы ірі көлемде қаражат жымқырды деп күдікке ілінген Перизат Қайраттың ісіне қатысты мәлімдеме жасады.
Kazinform агенттігінің сауалына жауап берген ведомство сот процесін тікелей эфирде көрсету қоғам тарапынан сұраныс болған жағдайда қарастырылатынын хабарлады.
«Перизат Қайратқа қатысты қылмыстық іс сотқа келіп түскен соң, қоғам мен заңгерлер тарапынан ашық сот отырысын өткізу туралы ресми өтініштер түссе, сот оны онлайн режимде жүргізу мүмкіндігін қарастырады», – делінген Жоғарғы соттың ресми жауабында.
Айта кетейік, Перизат Қайрат – «Біз біргеміз» қорының негізін қалаушылардың бірі. Ол мен анасы Ғайни Алашбаеваға қатысты қылмыстық істі Қаржылық мониторинг агенттігі аяқтап, 19 наурызда тараптар 109 томнан тұратын іс материалдарымен таныса бастаған.
Агенттік төрағасының орынбасары Жеңіс Елемесовтің айтуынша, 9 маусымда танысу процесі аяқталып, заң бойынша үш күн ішінде істі прокуратураға жіберу қарастырылған.
«Прокуратура істі 10 күн ішінде сотқа жолдайды. Сот іс түскен соң, қай күні қаралатынын хабарлайды», – деді Жеңіс Елемесов.