RUS
SMARTNEWS.KZ басылымының хабарлауынша, Өзбекстан президенті Шавкат Мирзиёевтің үлкен қызы Саида Мирзиёева ел Президенті әкімшілігінің басшысы қызметіне тағайындалды. Бұл туралы мемлекет басшысының баспасөз хатшысы Шерзод Асадов хабарлады.
«Өзбекстан Республикасы Президентінің Жарлығымен Саида Шавкатовна Мирзиёева Президент әкімшілігінің басшысы болып тағайындалды», – делінген ресми хабарламада.
Айта кетейік, бұл лауазым 2023 жылдың тамызында жойылған болатын. Ол кезде Мирзиёева Мемлекет басшысының көмекшісі қызметін атқарған. Ал жаңа тағайындауға дейін бұл құрылым президент жарлығымен қайта қалпына келтірілген.
Саида Мирзиёева саясатта 2019 жылдан бері белсенді. Бұған дейін ол Мемлекет басшысының көмекшісі, сондай-ақ ақпараттық саясат пен коммуникацияға жауапты сектордың жетекшісі болған. Бұл сектор кезінде Президент әкімшілігі басшысының орынбасары Комил Алламжановқа қараған.
Мирзиёева — Дүниежүзілік экономика және дипломатия университетінің түлегі, Ташкент мемлекеттік заң университеті мен М.В. Ломоносов атындағы ММУ-де магистратура бітірген. Экономика ғылымдарының кандидаты.