RUS
SMARTNEWS.KZ басылымының хабарлауынша, АҚШ пен Израильдің бірлескен операциясы Иранның ядролық нысандарына айтарлықтай зақым келтіргенімен, оның бағдарламасы тек бірнеше айға ғана тежелген. Бұл туралы АҚШ Қорғаныс министрлігіне қарасты Барлау басқармасының (DIA) баяндамасында айтылды.
Аталған есеп АҚШ президенті Дональд Трамптың бұрынғы мәлімдемесіне қайшы келеді. Ол ядролық нысандарға бағытталған «нақты және дәл операция» нәтижесінде Иранның бағдарламасы «толық жойылды» деп мәлімдеген еді. Оның айтуынша, шабуыл кезінде Фордо, Натанз және Исфахандағы нысандарға 30 000 фунттық (13 600 кг) «бункер-бустер» бомбалары тасталған.
Алайда барлау есебіне сүйенсек, негізгі зақым жер үстіндегі инфрақұрылымға келген. Ал Фордо сияқты жер астында орналасқан, аса қорғалған ядролық нысандардың ішкі жүйесі бүтін қалған. Сонымен қатар, жоғары байытылған уранның бір бөлігі соққыға дейін жасырын басқа нысандарға көшірілгені айтылып отыр. CIA-дың мәліметінше, Иранның центрифугаларының көпшілігі де зақымданбаған.
Ақ үй бұл есепті жоққа шығарды, ал оның баспасөз хатшысы Каролин Ливитт бұл ақпаратты «Трампты кемсітуге бағытталған жалған мәлімет» деп атады.
«14 үлкен бомба нысанаға дәл тиген кезде не болатынын бәрі біледі — бұл толық жойылу», – деді Ливитт.
Соған қарамастан, Трамп кейінгі мәлімдемелерінде «Иран ядролық бағдарламасын енді ешқашан қалпына келтіре алмайды» деп қайталап жүр.
Израиль премьер-министрі Биньямин Нетаньяху да мәлімдеме жасап, олардың 12 күнге созылған әскери операциясын «тарихи жеңіс» деп бағалады.
«Біз Иранның ядролық қару жасау қаупін және 20 мың баллистикалық зымыран қауіпін жойдық», – деді ол.
Ал Иран өз кезегінде АҚШ-пен келіссөз жүргізуге дайын екенін мәлімдеді. Бірақ Тегеран өзінің «заңды құқықтарын» қорғайтынын және Израиль тарапынан кез келген келісімді бұзу әрекетіне жауап қайтаратынын ескертті.