RUS
SMARTNEWS.KZ басылымының хабарлауынша, АҚШ президенті Дональд Трамп Израиль мен Иранды бітім режимін бұзғаны үшін ашық сынға алды. Ол жағдайға эмоциялық реакция білдіріп, бейәдеп сөз қолдануға дейін барған.
Ақ үй басшысы екі ел арасындағы шабуыл алмасуға қатысты пікір білдіріп, мұндай әрекеттер бітімге қауіп төндіретінін айтты. Оның айтуынша, тараптар келісімге келіп үлгерген кезде де атыс тоқтатылмаған: Израиль зымыранмен атқыланғанын айтып, жауап ретінде "символдық" шабуыл жасаған.
"Бізде бір-бірімен осыншалықты ұзақ әрі жойғын соғысқан екі ел бар. Енді олар не істеп жатқандарын, сайтан алғыр, өздері де түсінбейді", – деді Трамп.
Ол әсіресе Израиль басшылығына қарата "масштабты эскалация болуы мүмкін" деп ескертті.
Кейін Трамп Израиль премьер-министрі Биньямин Нетаньяхумен телефон арқылы сөйлескен. Израиль тарабы Иранға қарсы әскери операция сәтті аяқталғанын, ядролық және зымыран қауіптерінің жойылғанын мәлімдеген.
АҚШ, өз кезегінде, Иранның үш ядролық нысанын бомбалаған. Бұл операция үшін Жерорта теңізіне "Джеральд Форд" атты авианосец бастаған соғыс кемелері жөнелтілген.
Сурет: 24 маусымда Иран зымыран шабуылынан кейін Беэр-Шева қаласындағы қираған үйлер. AP Photo
Ал Тегеран ядролық бағдарламасының тек бейбіт мақсатта екенін мәлімдеп келеді. Дегенмен, 13 маусымда Израиль МАГАТЭ есебінен кейін Иран нысандарын атқылай бастаған. Ұйым Иранның ядролық қаруды таратпау туралы міндеттемелерін бұзғанын айтқан болатын.
Израиль шабуылдарын "экзистенциалды қауіпке жауап" деп атады. 11 күндік қақтығыс кезінде Иран Израиль аумағына зымырандар мен дрондар жіберіп отырған.
Спутниктік сурет (Maxar Technologies) – Фордо уран байыту зауытындағы жарылыс іздері
АҚШ тарапы Иран ядролық бағдарламасының толық жойылғанын алға тартса да, әзірге бұл жайында тәуелсіз растау жоқ. Иран өз кезегінде шабуылдар басталмай тұрып кейбір материалдар мен құралдарды басқа орындарға көшіргенін айтқан. Дегенмен Израиль шабуылдарында кемінде 10 ядролық физиктің көз жұмғаны хабарланды.