RUS
SMARTNEWS.KZ басылымының хабарлауынша, әскери борышын өтеп жүргенде ауыр жарақат алып, мүгедек болып қалған Ербаян Мұхтардың Түркиядан елге оралғанына 4,5 ай болды. Қазір ол оңалудың бел ортасында. Оның қазіргі жағдайы туралы жеке массажисі айтып берді.
Маманның айтуынша, соңғы бірнеше айда Ербаян айтарлықтай алға жылжыған. Арқасын тік ұстауды үйреніп, өздігінен тік тұрып, мойын бұлшықеттерін басқаруға қабілетті бола бастаған. Сол қолы мен аяғында қимыл реакциясы пайда болған. Сонымен қатар салмақ қосып, енді тағамды арнайы зондсыз, ауыз арқылы қабылдайды.
«7,5 ай ішінде бұл – үлкен жетістік. Емделу баяу жүріп жатыр, бірақ тұрақты. Мұндай жағдайда ең маңыздысы – үміт пен табандылық», – деді массажист.
Оның айтуынша, екінші кезеңдегі емін жалғастыру үшін Ербаян тағы да Ыстанбұлға аттанады. Массажист жігіттің толық сауығып кететініне сенімді.
Еске салайық, 2024 жылдың 27 қыркүйегінде Ербаян Мұхтарды құқық қорғаушылар мен бейжай қалмаған азаматтардың көмегімен Түркияға емделуге жіберген болатын.
Бұған дейін Ербаянның отбасының адвокаты – Ұлттық ұланда әскери борышын өтеп жүргенде комаға түсіп, мүгедек болып қалған сарбаздың Астанадағы нейрохирургия орталығына жеткізілгенін хабарлаған. Кейін ата-анасы оны Германияға апарғысы келген.
Айта кетейік, 22 жастағы Ербаян Мұхтар жарты жылдық әскери қызметінен кейін кенет комаға түсіп қалған. Ресми мәліметке сәйкес, ол әжетханада құлап, басын соққан. Бірақ отбасы бұған күмән келтіреді, себебі қарапайым құлаудан мидың ісінуі, бассүйектің сынуы және маңдай-шеке аймағындағы ауыр қан құйылу сияқты жарақаттар болмауы тиіс еді.
Қазір Ербаянның жағдайы мен бұл оқиға бойынша тергеу жалғасып жатыр.