RUS
SMARTNEWS.KZ басылымының хабарлауынша, Ұлыбритания билігі алғаш рет ел аумағында соғыс қаупін ашық мойындап, азаматтарын және мемлекеттік құрылымдарды ықтимал әскери қақтығысқа дайындалуға шақырды. Бұл туралы 24 маусымда жарияланған Ұлыбританияның ұлттық қауіпсіздік стратегиясының жаңа нұсқасында айтылған.
Құжатта қазіргі геосаяси ахуал «драмалық өзгерістер кезеңі» деп сипатталып, басты қауіп көздері ретінде Ресейдің Украинаға қарсы соғысы, Мәскеудің аумақтық амбициялары, заңсыз көші-қонның гибрид соғыс құралына айналуы, Таяу Шығыс пен Индо-Тынық мұхиты аймағындағы қақтығыстар және кибершабуылдар аталды.
«Бірінші рет біз Ұлыбритания аумағына тікелей қауіп төну мүмкіндігіне белсенді түрде дайындалуымыз керек», – делінген құжатта.
Құжатта автоматтандырылған логистикалық жүйелер мен энергетика саласы ықтимал шабуыл нысанасы болуы мүмкін екені ескертіледі.
Стратегияда Ресейдің Украинадағы соғыспен қатар, НАТО елдеріне, соның ішінде Ұлыбританияға қарсы кибершабуылдар мен диверсиялар ұйымдастырғаны айтылған. Сонымен қатар, Мәскеудің ядролық риторикасы Киевке қолдау білдіріп отырған мемлекеттерді қорқытуға бағытталғаны баса көрсетілген.
Иран да "Ұлыбритания аумағындағы дұшпандық әрекеттермен" айыпталып отыр. Тегеран режимінің сыншыларына қысым жасау әрекеттері, тікелей қауіптер және режим оппоненттерін тұншықтыруға тырысқаны құжатта нақты көрсетілген.
Қытай да назардан тыс қалмады
Лондон Бейжіңнің Украинаға басып кіру кезінде Путинге әскери-техникалық қолдау көрсеткенін және Қытайдың өз әскери жүйесін қарқынды жаңғыртып жатқанын атап өтті. Ұлыбритания болашақта ҚХР-мен қарым-қатынаста "сенімділік пен тұрақтылық" қағидатына сүйенетінін айтты.
Азаматтық төзімділік пен киберқауіпсіздік күшейтіледі
Британ үкіметі ел ішінде азаматтарды төтенше жағдайларға дайындайтын арнайы жаттығулар өткізуді, бизнес пен ғылыми орта өкілдерімен бірлесе отырып, киберқауіпсіздік жүйесін жетілдіруді және интернеттегі заңсыз контенттің таралуын тоқтатуды көздеп отыр. Сондай-ақ, Ұлыбритания өзге елдермен бірлескен оқу-жаттығуларын күшейтпек — тек әскери емес, сонымен қатар пандемия сынды дағдарыс жағдайларына дайындық сценарийлерін де қамтиды.
Қорғанысқа бөлінетін қаражат артып, АҚШ-тан ядролық ұшақтар сатып алынады
Ұлттық қауіпсіздік стратегиясы жарияланардан бір күн бұрын Ұлыбритания премьер-министрі Кир Стармер НАТО саммитінде сөйлеген сөзінде 2035 жылға қарай елдің қорғаныс шығындары ЖІӨ-нің 5 пайызына дейін жеткізілетінін мәлімдеді. Бұл — АҚШ тарапынан айтылған сыни пікірлер мен Трамптың НАТО-дағы Ұлыбританияның рөлін шектеу туралы мәлімдемелеріне жауап ретінде қарастырылып отыр.
Сондай-ақ Лондон Вашингтоннан кемінде 12 F-35A үлгісіндегі жойғыш ұшақ сатып алуды жоспарлап отыр. Бұл ұшақтар ядролық қару — B61 термоядролық бомбаларын тасымалдауға қабілетті. Қазіргі уақытта Ұлыбританияның ядролық әлеуеті тек сүңгуір қайықтармен шектеледі. Жаңа ұшақтар мен бомбалар сатып алу арқылы Ұлыбритания ядролық тосқауыл жүйесін кеңейтпек.
"Қазіргі әлемде тұрақтылықты бұрынғыдай бірқалыпты деп қарауға болмайды. Сондықтан біздің үкімет ұлттық қауіпсіздікке инвестиция салуды таңдады", — деді премьер Стармер.