Жаңа шектеу: Қыркүйектен бастап аударымдар бақылауға алынады

SMARTNEWS.KZ басылымының хабарлауынша, Қазақстанда 2025 жылдың қыркүйек айынан бастап мобильді аударымдарға қатысты жаңа тексеру тәртібі күшіне енеді. Қаржы вице-министрі Ержан Біржановтың мәлімдеуінше, үш ай ішінде бір адамға 100 түрлі адамнан 1 миллион теңгеден астам ақша түссе, салық органдары тексеріс жүргізе алады.

Бұл өзгерістер Мәжілісте қабылданған Салық кодексіне енгізілген түзетулерден кейін жүзеге асырылады. Жаңа нормалар заң күшіне енгеннен кейін 60 күн ішінде іске қосылады.

Біржановтың айтуынша, аталған тәртіп туыстар арасындағы қаржылық аударымдарға қолданылмайды. «Мысалы, анасы қызына немесе ағасы інісіне ақша жіберсе – ешқандай мәселе туындамайды, тіпті сома бірнеше миллион болса да. Ең бастысы – барлық критерийлер бір уақытта орындалуы керек», – деді вице-министр.

Тексеру үш шартқа негізделеді:

1. Аударымдар 100 түрлі адамнан келуі тиіс;

2. Бұл ақша үш ай қатарынан түсуі керек;

3. Жалпы сома 1 миллион теңгеден (яғни, 2025 жылға белгіленген 12 ең төменгі жалақы – 1 020 000 теңге) асуы қажет.

Қаржы министрлігінің түсіндіруінше, тек жеке тұлғалар арасындағы мобильді аударымдар ескеріледі. Ал банкомат арқылы шот толтыру, депозиттен ақша шешу, жалақы және әлеуметтік төлемдер бұл тізімге кірмейді.

Бастапқыда мобильді аударымдарға арналған шектеу 255 мың теңге көлемінде болуы ұсынылған, алайда бұл шек Ұлттық банк пен банктердің араласуымен айтарлықтай ұлғайтылды.

Жаңа талаптар кәсіпкер ретінде тіркелмеген азаматтар үшін енгізіліп отыр. Егер олардың шотына жоғарыда аталған талаптарға сәйкес қаражат түссе, салық органдары оның нақты қайдан келгенін тексере бастайды.