RUS
SMARTNEWS.KZ басылымының хабарлауынша, Иранда Израиль барлау қызметі «Моссадпен» байланысы бар деп айыпталған үш адамға қатысты өлім жазасы орындалды. Қауіпсіздік органдарының мәліметінше, олар 25 маусым күні Урмия қаласындағы түрмеде дарға асылған. Бұл туралы Fars агенттігі ресми дереккөздерге сілтеме жасап мәлімдеді.
Тергеу мәліметі бойынша, олар Иранға террористік әрекеттер жасауға арналған жабдықты заңсыз алып өтпек болған. Жүктерді алкоголь өнімі ретінде жасырып тасымалдаған — бұл елде қатаң тыйым салынған. Айыптау қорытындысында бұл әрекет ел ішіндегі тұрақтылықты бұзуға бағытталғаны айтылған.
Бұған дейін, 22 маусымда, Иранда тағы бір азаматтың өлім жазасы орындалған. Оған Израиль барлауына құпия мәліметтер берген деген айып тағылған. Nour News мәліметінше, ол «Моссад» агентіне жүйелі түрде есеп беріп отырған және ел ішіндегі адамдар мен жасырын әрекеттер жайлы ақпарат жеткізген.
Сондай-ақ, жақында Иран құқық қорғау органдары Тегеран маңындағы Рэй қаласында бірнеше терактінің алдын алғанын мәлімдеген. Mehr агенттігінің дерегінше, шабуыл ұйымдастырмақ болған топтың «Моссадпен» байланысы болуы мүмкін. Арнайы қызметтің жедел әрекеттерінің арқасында қауіптің барлығы дер кезінде жойылған.