RUS
Іс-шараға қала және аудан әкімдері, түрлі сала жетекшілері, білім, медицина, мәдениет, спорт саласының мамандары, құқық қорғау органдарының өкілдері, белсенді жастар мен зиялы қауым өкілдері қатысты.
Форумда аймақ басшысы қазіргі қоғам алдында тұрған өзекті мәселелерге тоқталып, болашаққа бағытталған бірлескен бастамалардың маңызын атап өтті. Ол цифрлық шешімдердің жедел дамуы жағдайында азаматтардың құқықтарын қорғау, қаржылық және құқықтық сауаттылықты арттыру – тұрақты дамудың негізгі факторларының бірі екенін атап өтті.
Президент Қасым-Жомарт Тоқаев өз Жолдауында «Заң мен тәртіп үстемдігі – әділетті әрі қауіпсіз қоғамның іргетасы» екенін баса айтқан болатын. Осыған орай, биыл Үкімет «2025–2030 жылдарға арналған Заң мен тәртіп идеологиясын ілгерілету тұжырымдамасын» бекітті. Аталған құжат аясында нақты міндеттер белгіленіп, өңірлерде кешенді жұмыс жүргізілуде.
Қызылорда облысында бұл бастамалар Экономикалық тергеп-тексеру департаментімен бірлесе отырып жүзеге асырылып келеді. Жаңа бастамалар әрдайым қолдау тауып отыр.
Форум барысында алаяқтық, интернет-қылмыстар, қаржылық пирамидалар, құмар ойындарға тәуелділік, кибершабуылдар мен гаджеттер арқылы жасалатын заманауи қылмыстардың артуы – қоғамға төнетін жаңа қауіптердің бірі ретінде аталды. Бұл тек жеке адамның мәселесі емес, тұтас ұрпаққа әсер ететін құбылыс екені ескертілді.
Қоғамда құқықтық мәдениетті нығайту үшін қала мен аудандарда құқық қорғау саласының өкілдері мен қоғамдық ұйымдардың қатысуымен тұрақты кездесулер өтуде. Бұл – халықтың мемлекетке деген сенімін нығайтып, әділетті қоғам құруға жол ашады.
Елімізде заңсыз ойын бизнесі мен лудоманияға қарсы заң қабылданып, психологиялық және рухани көмек көрсету бағытындағы жұмыстар күшейтілуде. Жастарға тек адал еңбектің ғана береке әкелетінін ұғындыру – басты мақсат.
Форум барысында облыс әкімі Нұрлыбек Нәлібаев:
«Бүгін айтылған тың идеялар мен бастамалар жүйелі іске асып, нақты нәтижелерге жетеді деп сенемін. Форумға сәттілік тілеймін», – деп атап өтті.
Іс-шарада Экономикалық тергеп-тексеру департаментінің басшылары мен орынбасарлары, дін және өнер өкілдері сөз сөйлеп, қаржылық сауаттылықтың артуы және лудоманияның зияны туралы кеңінен баяндама жасады. Форум соңында өңірдің қоғамдық өміріне белсене араласқан азаматтар облыс әкімінің Алғыс хатымен марапатталды.
