RUS
SMARTNEWS.KZ басылымының хабарлауынша, АҚШ Орталық барлау басқармасының (ОББ) Ирандағы бірнеше ядролық нысан толықтай жойылғанын айтты. Бұл туралы ОББ басшысы Джон Рэтклифф 25 маусым күні арнайы мәлімдеме жасады.
Оның айтуынша, бұл ақпарат "тарихи тұрғыдан сенімді әрі дәлелді барлау көзіне" сүйене отырып беріліп отыр.
"Ядролық объектілердің бір бөлігін қалпына келтіру үшін бірнеше жыл қажет болады", – делінген құжатта.
ОББ қазіргі уақытта қосымша мәліметтер жинап, шешім қабылдайтын лауазым иелерін хабардар етіп отырғанын айтты.
Алайда, дәл осы күні CNN арнасы мен The New York Times газеті АҚШ әскери барлауына сілтеме жасай отырып, басқа мәлімет жариялады. Олар:
– ядролық бағдарламаның негізгі элементтері сақталып қалғанын,
– байытылған уран жойылмағанын,
– центрифугалар көп жағдайда жұмыс істеп тұрғанын хабарлады.
Бір дереккөздің айтуынша, Иран АҚШ соққысына дейін уран қорларын қауіпсіз жерге көшіріп үлгерген.
Бірақ Ақ үй бұл болжамдармен келіспейтінін мәлімдеді. Президент Дональд Трамп өзінің Truth Social парақшасында CNN мен The New York Times-ты "жалған ақпарат таратып, тарихи маңызды әскери операцияны төмендетуге тырысып жатыр" деп айыптады.
“Бұл – тарихтағы ең сәтті әскери соққылардың бірі. Иранның ядролық нысандары толықтай жойылды!” – деп жазды Трамп.