Ресейден заңсыз шошқа етін тасығандар ұсталды
Ресейден Қазақстанға шошқа етін заңсыз әкелу әрекеті әшкереленді.
SMARTNEWS.KZ басылымының хабарлауынша, Батыс Қазақстан облысындағы "Сырым" ветеринариялық бақылау-өткізу пунктінде шекарашылар мен Ауыл шаруашылығы министрлігінің өкілдері бірлесіп жүргізген тексеру кезінде Ресейдің Белгород облысынан Алматы қаласына бет алған DAF жүк көлігі тоқтатылды.
Тексеру нәтижесінде 5 тонна шошқа еті ешқандай ветеринариялық құжатсыз тасымалданғаны анықталды. Заң бұзушылықтың анықталуына байланысты жүк көлігі кері қайтарылды, ал жүргізушіге қатысты Әкімшілік құқықбұзушылық туралы кодекстің 406-бабы бойынша хаттама толтырылды.
Ауыл шаруашылығы министрлігінің мәліметінше, Батыс Қазақстан облысы аумағындағы бақылау бекеттерінде жыл басынан бері 129 заңбұзушылық тіркелген. Соның нәтижесінде:
129 автокөлік ел аумағынан шығарылды;
76 адамға әкімшілік хаттама рәсімделді;
6,4 млн теңгеден астам айыппұл салынды.
Министрлік шекара арқылы жануарлар мен жануар тектес өнімдерді тасымалдау кезінде ветеринариялық-санитариялық талаптарды қатаң сақтауды ескертеді. Бұл талаптар ел аумағына қауіпті аурулардың кіруіне жол бермеу үшін енгізілген.
Материал авторы
