RUS
SMARTNEWS.KZ басылымының хабарлауынша, Солтүстік Корея шілде немесе тамыз айында Ресейге қосымша әскерін жөнелтеді. Бұл туралы Оңтүстік Кореяның Ұлттық барлау қызметі мәлімдеді.
Оңтүстік Корея парламентіндегі жабық тыңдауда Ұлттық барлау қызметі (NIS) Солтүстік Кореяның Ресейге Украинадағы соғысқа қатысу үшін тағы да әскери күш жіберетіні туралы ақпарат ұсынды. Барлау мәліметінше, бұл әскери көмек шілде немесе тамыз айларында жүзеге асуы мүмкін.
Бұған дейін Ресейдің қауіпсіздік кеңесінің хатшысы Сергей Шойгу ресейлік БАҚ-қа берген мәлімдемесінде Пхеньян Курск облысына 5000 әскери құрылысшы мен 1000 сапер (инженерлік әскер өкілдері) жіберуді жоспарлап отырғанын айтқан болатын. "КХДР Мемлекеттік істер төрағасы Ким Чен Ын Ресейге 1000 сапер мен 5000 әскери құрылысшы жіберу туралы шешім қабылдады", – деп мәлімдеді Шойгу 17 маусымда Солтүстік Кореядан оралған соң.
КХДР — Мәскеудің Украинадағы агрессиясындағы тікелей серіктесі
Солтүстік Корея ресми түрде Ресейдің Украинаға қарсы соғысына көмек көрсетіп отырғанын алғаш рет Ресей Бас штаб басшысы Валерий Герасимов сәуір айының соңында мойындады. Ол Курск облысындағы ұрыс қимылдарына КХДР әскери қызметкерлері қатысқанын растады. Бұл ақпарат бұған дейін Оңтүстік Корея мен Батыс барлау қызметтері тарапынан айтылып келген еді.
Yonhap агенттігінің мәліметінше, NIS Солтүстік Кореяның Ресейге 10 миллионнан астам артиллериялық снаряд, зымыран және алыс қашықтықтағы соғыс техникаларын бергенін де хабарлаған. Мұның есесіне Пхеньян Мәскеуден экономикалық және техникалық көмек алған.