RUS
SMARTNEWS.KZ басылымының хабарлауынша, Ақтөбе облысында жол талғамайтын аумақпен жүргенде жоғалып кеткен атасы мен немересін іздестіру аяқталды. Екеуінің денесі су астынан табылған көліктің ішінен табылды.
Қайғылы оқиға Хромтау ауданында болған. Төтенше жағдайлар департаментінің мәліметінше, 25 маусым күні 65 жастағы ер адам мен оның кәмелетке толмаған немересі жоғалып кеткені туралы хабар түскен. Олар Toyota Hilux көлігімен Құдықсай ауылынан Бозжыр аймағына бет алған, алайда үйлеріне оралмаған.
Келесі күні құтқарушылар мен сүңгуірлер қатысқан ауқымды іздестіру жұмыстары басталды.
— 26 маусым күні сағат 19:30 шамасында Құдықсай ауылы маңындағы Ой өзенінің арнасын тексеру барысында су астындағы көлік анықталды. 2,5 метр тереңдікте, жағадан шамамен 4 метр қашықтықта баланың денесі табылып, артынша көлік пен ер адамның мәйіті судан шығарылды, — деп хабарлады Ақтөбе облыстық ТЖД.
Қазіргі уақытта көліктің суға қалай түсіп кеткені белгісіз. Қайғылы жағдайдың нақты себептері анықталып жатыр.
Облыстық Төтенше жағдайлар департаменті өңір тұрғындарын су айдындары маңында қауіпсіздік шараларын қатаң сақтауға, сондай-ақ қиын жететін аумақтарда абай болуға шақырады. Төтенше жағдай орын алса, бірден 112нөміріне хабарласу қажет.