RUS
SMARTNEWS.KZ басылымының хабарлауынша, Маңғыстау облысында ірі жол-көлік апаты тіркелді. Ақтау қаласына жақын Маңғыстау ауылының маңында жолаушылар автобусы мен бес жеңіл көлік соқтығысып, алты адам жарақат алды.
Оқиға 27 маусым күні кешкі уақытта болған. Куәгерлердің айтуынша, апатқа Ravon және тағы бірнеше жеңіл көлікпен қатар, жолаушылар автобусы да қатысқан. Болжам бойынша, жол апатына полициядан қашқан Toyota Sienna көлігінің жүргізушісі себеп болған.
Бейресми ақпаратқа сай, бір адамның көз жұмғаны, ал екі адамның жағдайы ауыр екені айтылған. Алайда, бұл мәлімет ресми түрде расталған жоқ, деп хабарлайды Lada.kz.
Облыстық көпбейінді аурухананың мәліметінше, апаттан зардап шеккен 6 адам ауруханаға жеткізілген. Алғашқы тексерістен соң төрт адам амбулаториялық емге жіберілді, ал екі науқас ауруханаға жатқызылған.
Ауыр жарақат алғандардың бірі – 1995 жылы туған ер адам. Оның бас сүйегі, төменгі жақ сүйегі, жамбас сүйегі, үлкен жіліншік сүйегі және оң аяғындағы бірнеше сүйек сынған. Ол нейрохирургия бөлімінежатқызылды.
Екінші науқас – 1975 жылы туған ер адам. Оның кеуде қуысы, оң жақ қабырғалары мен иығы сынғаны анықталды. Ол хирургия бөліміне түсті.
Қазіргі уақытта екі науқас дәрігерлердің бақылауында. Апаттың мән-жайын анықтау үшін тергеу жұмыстары басталды.