RUS
SMARTNEWS.KZ басылымының хабарлауынша, Украина мен Еуроодақ арасында жаңа сауда келісімі жасалды. Бұл құжат 2022 жылдан бері уақытша негізде жұмыс істеп келген сауда ережелерін алмастырады.
Еурокомиссия дүйсенбі күні украиналық тараппен келіссөздерден кейін Украинамен жаңа сауда шарттары бойынша негізгі уағдаластыққа қол жеткізілгенін мәлімдеді. Келісім «Тереңдетілген және жан-жақты еркін сауда аймағы» (DCFTA) аясында жасалды. Бұл — Украина мен ЕО арасындағы негізгі сауда құрылымы.
Еурокомиссия президенті Урсула фон дер Ляйен бұл келісімді Украина мен ЕО арасындағы толық интеграция жолындағы маңызды қадам деп бағалады.
Уақытша тәртіп аяқталды
2022 жылы Ресейдің Украинаға басып кіруінен кейін ЕО украин өнімдеріне қатысты барлық тарифтер мен квоталарды алып тастаған болатын. Бұл – Автономды сауда шаралары (ATM) деп аталды. Алайда оның мерзімі 2024 жылғы маусымда аяқталды.
Жаңа келісім – бұрынғыдай шектеусіз қолдау емес, ЕО фермерлерінің мүддесін де ескеретін теңгерімді құжат. Өйткені бұған дейін Франция, Польша сынды елдерде фермерлер украиналық өнімдер тасқынына қарсы наразылық білдірген болатын.
Келісімнің басты шарттары
ЕО-ның сауда жөніндегі комиссары Марош Шефчович жаңа келісімді «әділ, теңгерімді және шынайы» деп атады.
– Украина 2028 жылға дейін ауыл шаруашылығы стандарттарын ЕО нормаларына сәйкестендіруге міндеттеме алды.
– ЕО нарықтарын қорғау үшін қатаң қорғау тетіктері енгізіледі. Жұмыртқа, қант, бидай секілді өнімдерге жаңа квоталар енгізілмек. Бұл квоталар бұрынғыға қарағанда шектеулі болады.
– Ал сүт өнімдері, саңырауқұлақ және жүзім шырыны секілді кейбір тауарларға толық либерализация қарастырылған.
– Украина да ЕО-дан келетін шошқа еті, құс еті, қант сияқты өнімдерге импорт квоталарын кеңейтуге және өз тауарларына салынатын кейбір кедендік алымдарды азайтуға келісті.
Бұл өзгерістер, әсіресе Украинамен шекаралас елдердегі еуропалық фермерлер үшін жаңа экспорт мүмкіндіктерін ашады.
Алда не күтіп тұр?
Келісімнің толық мәтіні әлі жарияланған жоқ, алайда техникалық тұстарын нақтылау жұмысы басталып кетті. Еурокомиссия жақын күндері құжатты ЕО елдеріне және Еуропарламентке ұсынады.
ЕО пен Украина арасындағы жаңа сауда келісімі бұрынғыдай шексіз қолдаудан аулақ. Бұл – екі жақтың мүдделерін ескеретін, саяси және экономикалық теңгерімді көздеген құжат. Украина үшін бұл – Еуроодаққа мүшелікке жақындаудың тағы бір нақты қадамы.