RUS
SMARTNEWS.KZ басылымының хабарлауынша, Көліктегі полиция департаменті Алматы әуежайында адамды кепілге алу дерегі бойынша қозғалған қылмыстық іс қайтадан сотқа жолданғанын мәлімдеді. Бұл туралы Kazinform жазды.
Еске салайық, 7 наурызда Алматы халықаралық әуежайында ер адам көпшілік көзінше қызды пышақпен қорқытып, кепілге алған болатын. Оқиға қоғамда үлкен резонанс туғызды.
Аталған іске қатысты Машрапбек Баратов күдікті ретінде танылып, оған Қылмыстық кодекстің бірнеше бабы бойынша айып тағылды:
ҚК 261-бабы (Кепілге алу),
ҚК 293-бабы (Бұзақылық),
ҚК 273-бабы (Терроризм актісі туралы көрінеу жалған хабарлау).
Бастапқыда іс жеделдетілген тәртіппен қаралуы тиіс еді. Алайда Түрксіб аудандық сотында сотталушы кепілге алу бабымен тағылған айыпты мойындамағандықтан, іс жалпы тәртіппен қайта тергелу үшін прокурорға қайтарылған.
Қайта тергеу нәтижесінде айыптаулар өзгеріссіз қалды. Сонымен қатар, жәбірленуші ретінде Мұса Абдраим танылып отыр.
Қазіргі таңда іс аяқталып, қайтадан сотқа жіберілді. Алғашқы сот отырысы 7 сәуірде өткен.