RUS
SMARTNEWS.KZ басылымының хабарлауынша, Қарағанды облысында заңсыз иемденілген активтерді қайтару есебінен бөлінген қаражатқа 51 денсаулық сақтау нысанының құрылысы жүргізілуде. Бұл нысандар «Ауылда денсаулық сақтауды жаңғырту» ұлттық жобасы аясында бой көтеріп жатыр.
Үкіметтің шешімімен Арнаулы мемлекеттік қордан бөлінген 5,9 млрд теңге Шет, Ақтоғай, Абай, Бұқар жырау, Қарқаралы, Нұра және Осакаров аудандарындағы дәрігерлік амбулаториялар мен фельдшерлік-акушерлік пункттердің құрылысын аяқтауға бағытталған. Бұл нысандар жыл соңына дейін пайдалануға берілуі тиіс.
Жаңа медициналық мекемелер шалғай ауыл тұрғындарына алғашқы медициналық-санитариялық көмектің қолжетімділігін арттырып, алдын алу, ерте диагностика және шұғыл көмек көрсету сапасын жақсартуға ықпал етпек.
Ұлттық жоба аясында республика бойынша 655 медициналық нысанның құрылысы жоспарланған. Оның ішінде 480 нысанның құрылысы аяқталып, пайдалануға берілді. Жобаларды қаржыландыру республикалық бюджет пен Арнаулы мемлекеттік қор есебінен жүзеге асырылып отыр.
Еске салайық, Мемлекет басшысы заңсыз алынған активтерді қайтару және оларды халықтың игілігіне пайдалану туралы тапсырма берген болатын. Қайтарылған қаражат әлеуметтік және инженерлік инфрақұрылымдарды дамытуға бағытталып келеді.