RUS
SMARTNEWS.KZ басылымының хабарлауынша, өткен аптада отандық ғылым орны толмас қазаға ұшырады.
Қазақ ғылымының дамуына зор үлес қосқан көрнекті химик, біртуар ұстаз, профессор Әлима Қайнекейқызы Жармағамбетова өмірден озды. Бұл туралы Ғылым және жоғары білім министрі Саясат Нұрбек хабарлады.
«Қаныш Сәтбаевтай тектінің тұяғы, ел ғылымының дара тұлғасы Әлима апайымыздың дүниеден озуы – барша ғылыми қауым үшін ауыр қаза. Қайнекейқызы өз саласының көшбасшысы, қажырлы зерттеуші және ғылымға жан-тәнімен берілген тұлға еді», – деп жазды министр.
Әлима Жармағамбетова – химия ғылымдарының докторы, ұзақ жылдар бойы ҚР Ұлттық ғылым академиясына қарасты Катализ және электрохимия институтында, кейін Д.В. Сокольский атындағы Жанармай, катализ және электрохимия ғылыми-зерттеу институтында түрлі лауазымдарды атқарған. Ол инженерліктен бастап, зертхана меңгерушісіне дейінгі ғылыми жолдан өтті. Соңғы жылдары органикалық катализ зертханасын басқарды.
Ол еліміздің болашағы үшін ғылымның маңызын терең түсінген ұстаз болды. «Кинетика және катализ», «Экологиялық катализ», «Мұнай химиясы», «Полимермен тұрақтандырылған наноқұрылымды катализаторлар» пәндері бойынша магистранттар мен докторанттарға дәріс оқып, жүздеген шәкірт тәрбиеледі.
300-ден астам ғылыми еңбектің авторы атанған ғалымның мақалалары халықаралық беделді журналдарда жарияланды. Оның ішінде Scopus базасындағы CiteScore көрсеткіші 35-тен жоғары 6 мақала мен 20-дан жоғары 4 мақаласы бар.
Әлима Қайнекейқызы Германия, Франция, Финляндия, Түркия, Ресей және Өзбекстанда өткен халықаралық конференцияларға қатысып, қазақ ғылымының мерейін шетелде көтерді.
«Қаныш Имантайұлының «Ғылымдағы басты тұлға – білікті кадрлар» деген сөзі бар. Әлима апай – дәл сондай тұлғаның жарқын үлгісі еді. Марқұмның отбасына, туған-туыстарына, әріптестеріне және барша ғылыми қауымға қайғырып көңіл айтамын. Жатқан жері жайлы, топырағы торқа болсын», – деп жазды Саясат Нұрбек.