RUS
SMARTNEWS.KZ басылымының хабарлауынша,Түркістан облысында кәмелетке толмаған қыздың ана атану дерегі бойынша қылмыстық іс тіркелді.
Ресми ақпаратқа сәйкес, 2024 жылдың маусым айында 16 жастағы қыз дүниеге бала әкелген. Жасөспірімнің босануына байланысты Түркістан облысының Полиция департаменті Қылмыстық кодекстің 122-бабының 1-бөлігі (он алты жасқа толмаған адаммен жыныстық қатынас жасау) бойынша сотқа дейінгі тергеп-тексеру жұмыстарын жүргізіп жатыр.
ІІМ мәліметінше, аталған іс бойынша күдікті ретінде 23 жастағы ер адамның әрекеті тексеріліп жатыр. Тексеру барысында күдіктінің іс тіркелген уақытта әскери қызметкер болмағаны анықталған. Қазіргі таңда істің басқа мән-жайлары ҚР Қылмыстық-процестік кодексінің 201-бабына сәйкес жария етілмейді.
Бұқаралық ақпарат құралдарында және әлеуметтік желілерде тараған мәліметтерге қарағанда, жыныстық қатынас қыз 9-сыныпта оқып жүрген кезінде басталған. Одан кейін тараптар арасында келісім жасалып, жасөспірімді 23 жастағы ер адамға үйлендірген. Алайда араға алты ай салып, қыз қайтадан өз үйіне оралған.
Оқиға бойынша қоғамда резонанс туындап, мәселе жұртшылықтың назарын аударды. Жасөспірімнің туыстарының айтуынша, қыз медициналық мекемеге есепке тұру кезінде құқық қорғау органдарына “өз еркімен тұрмысқа шыққанын” жазып берген.
Қазіргі таңда тергеу амалдары жалғасып жатыр. Құқық қорғау органдары іске қатысты барлық мән-жайды анықтап, заң аясында процессуалдық шешім қабылданатынын мәлімдеді.
