RUS
SMARTNEWS.KZ басылымының хабарлауынша, Қарағанды облысында теміржол бойында екі жасар бала пойыздың астына түсіп, қайтыс болды.
Оқиға 1 маусымда Қарағанөзек пен Қарабас станцияларының арасында болған. Баланың өмірі үшін бірнеше күн күрескен дәрігерлер оны аман алып қала алмады.
Алдын ала мәлімет бойынша, жүк пойызының машинисі рельс үстіндегі баланы көріп, апатты тоқтату тетігін басқан. Бірақ пойыздың екпіні соншалық – тоқтауға үлгермеген. Бала ауыр жараланып, облыстық балалар ауруханасына жеткізілді. Алайда алған жарақаттары өте ауыр болған.
– Дәрігерлер қолдан келгеннің бәрін жасады. Бірақ жағдайы тым ауыр еді. Сәби көз жұмды, – деп мәлімдеді облыстық денсаулық сақтау басқармасы.
Полиция бұл дерек бойынша қылмыстық іс қозғады. Қазір тергеу жүріп жатыр. Баланың теміржол бойына қалай тап болғаны, қай жерде қараусыз қалғаны және нақты кімнің жауапты екені анықталуда.