RUS
SMARTNEWS.KZ басылымының хабарлауынша, 2 шілде күні Әзірбайжан Сыртқы істер министрлігі Ресейдің Бакудегі елшісі Михаил Евдокимовты шұғыл түрде шақырып, ресми нота тапсырды.
Наразылыққа бірнеше оқиға себеп болды — олардың қатарында AZAL әуе компаниясының ұшағының Ақтауда апатқа ұшырауы мен Ресейдегі әзірбайжан азаматтарына қарсы бағытталған іс-әрекеттер бар.
Ұшақ апаты мен Ресейдің үнсіздігі
2024 жылғы 25 желтоқсанда Бакуден Грозныйға бағыт алған AZAL ұшағы Ақтауға жақын маңда құлаған болатын. Бұл трагедияға байланысты Мәскеу тарапынан ашық тергеу де, ресми түсініктеме де берілмеген. Әзірбайжан тарапы бұл әрекетсіздікті «қабылдауға болмайды» деп санайды.
Жуырда әзірбайжандық БАҚ ресейлік ұшқыштың түсініктемесін жария етті. Құжатқа сәйкес, ол беспилотниктер шабуылы кезінде әуеде белгісіз нысананы жою туралы бұйрық бергенін растаған. Бұл түсініктеме шынайы болуы мүмкін, дейді сарапшылар.
Әзірбайжан апатқа толық әрі әділ тергеу жүргізуді, кінәлілерді жауапқа тартуды және құрбан болғандардың отбасыларына өтемақы төлеуді талап етіп отыр.
Екатеринбургтегі рейдтер және этникалық қысым
27 маусымда Ресейдің Екатеринбург қаласында әзірбайжан диаспорасына қарсы жаппай рейдтер жасалып, шамамен 50 адам тергеуге алынған. Нәтижесінде екі адам қайтыс болды, тағы бірнешеуі ауыр жараланған. Әзірбайжан тарапы бұл оқиғаларды этникалық сипаттағы қысым ретінде қабылдап отыр.
Сыртқы істер вице-министрі Араз Азимов Ресейдің әрекетін «достыққа қарсы және арандатушылық» деп атады. Оның айтуынша, «этникалық қылмыстық топтар» деген ұғымдарды ресейлік тараптың қолдануы — ашық араздықты қоздыру.
«Sputnik-Азербайджан» ісі мен БАҚ қысымы
Сондай-ақ Баку жақында ресейлік «Sputnik-Азербайджан» редакциясына қатысты тергеулерді заң аясында жүргізіп жатқанын атап өтті. Ал Мәскеу бұл тексерулерді қысым деп бағалауда.
Қарым-қатынастағы дағдарыс
Әзірбайжан тарапы Мәскеуге ескерту жасады:
«Қысым мен этникалық өшпенділік – көршілік қатынастың жолы емес».
Егер Ресей тарапы саясатын қайта қарамаса, екі ел арасындағы қарым-қатынас одан әрі нашарлауы мүмкін.