RUS
SMARTNEWS.KZ басылымының хабарлауынша, Павлодар облысының мамандандырылған ауданаралық қылмыстық соты өгей әкені кәмелетке толмаған қызды зорлағаны үшін қатаң жазаға кесті. Ол 23 жылын орташа қауіпсіздік мекемесінде өткізеді.
Ер адам екі бірдей бап бойынша — ҚР ҚК-нің 120-бабы 4-бөлігі және 121-бабы 4-бөлігі (кәмелетке толмағанға қатысты зорлау және сексуалдық сипаттағы күш қолдану әрекеттері) бойынша кінәлі деп танылды.
«Сотталушыны жоғарыда аталған екі баппен кінәлі деп танып, жиынтық түрде 23 жыл бас бостандығынан айыру жазасы тағайындалсын», – деп үкім оқыды судья Нұрлан Айтбаев.
Соттың түсіндіруінше, қылмыс ескі Қылмыстық кодекс редакциясы күшінде болған кезде жасалған, сондықтан сол кездегі жаза нормалары қолданылды.
Сотталушы жәбірленушіге 8 миллион теңге көлемінде моральдық өтемақы төлеуге міндеттелді.
Сот отырысы жабық режимде өтті. Тергеу материалдарына сәйкес, ер адам қызды алғаш рет 2017 жылы, оның жасы 8-де болғанда зорлаған. Ол кезде анасының азаматтық некедегі күйеуі болған. Кейін екеуі заңды некеге тұрған соң Майқайың кентіне қоныс аударған, сол жерде зорлық әрекеттерін жалғастырған.
Қазіргі уақытта сотталған азамат – төрт баланың әкесі. Ұсталмастан бұрын Павлодар облысындағы алтын өндіретін кәсіпорында слесарь болып жұмыс істеген.
Үкім әзірге заңды күшіне енген жоқ.