RUS
SMARTNEWS.KZ басылымының хабарлауынша, Ақтөбеде әйелді кепілге алған С.Басановқа қатысты сот процесінде прокурор айыпталушыны өмір бойына бас бостандығынан айыруды сұрады. Қылмыстық істер жөніндегі мамандандырылған ауданаралық сотта жарыссөз өтті.
Прокурор Гүлзира Көшербаеваның айтуынша, сотталушының кінәсі куәгерлердің жауабы, жәбірленушілердің түсінігі мен сараптама қорытындыларымен толық дәлелденген.
«Басанов аса ауыр қылмыс жасады. Ол сау болған, мас емес, аффект күйінде болмаған. Психикалық ауытқуы жоқ. Қылмыстық кодекстің 99-бабының 2-бөлігі (адам өлтіру), 126-бабының 2-бөлігі (бостандықтан заңсыз айыру) және 107-бабы (денсаулыққа орташа ауырлықта зиян келтіру) бойынша айыпты деп танылып, өмір бойына бас бостандығынан айырылуы керек», – деді прокурор.
Сондай-ақ мемлекеттік айыптаушы жәбірленушілердің моральдық және материалдық өтемақы талаптарын қанағаттандыруды сұрады. Жәбірленуші тарап прокурордың талабын қолдады.
Сотталушы соңғы сөзінде анасы мен баласы барын айтып, жеңіл жаза сұрады:
«Мен қатігез адам емеспін. Армандарым көп еді. Анашыма да, балама да керекпін. Өмір сүргім келеді», – деді С.Басанов.
Сот үкімі бүгін, 3 шілде күні, сағат 17:30-да жарияланады.
Еске салсақ, 13 қаңтар күні Ақтөбеде ер адам әйелді кепілге алып, салдарынан үш адамның екеуі қаза тапқан, біреуі ауруханаға жеткізілген. Қамауға алынған күдіктіге бірнеше бап бойынша айып тағылған. Сот барысында айыпталушы кінәні ішінара мойындады.