RUS
SMARTNEWS.KZ басылымының хабарлауынша, Атырау облысында, Индер ауданы мен Батыс Қазақстан облысы арасындағы құрылыс алаңында табиғат пен техниканың қақтығысы орын алды.
Газ құбырын төсеу жұмыстары кезінде экскаватор жүргізушісі Аскар Иманғали бірнеше апта бұрын қазылған траншеядан тірі балапандарды байқаған. Оның айтуынша, ол алдымен шиқылдаған дыбыс естіп, жақындап барғанда ондаған құстың балапандарын көрген.
«Қолымнан келмеді. Ковшты түсіре алмадым. Бұл тіршілік қой. Жұмысымнан айырылып қалатынымды білдім, бірақ оларды көме алмадым», – дейді құрылысшы.
Асқар бұл сәтті видеоға түсіріп, компания басшылығына жолдаған. Ол Теңіз кен орнында шетелдік мердігерлер де балапандар ұшып кеткенше жұмысты тоқтатқан жағдайды еске салған. Алайда бұл жолы құрылыс тоқтатылмады – келесі күні-ақ траншея құммен көміліп, Асқар жұмыстан шеттетілді, оның орнына басқа оператор келді.
«Мен ештеңе істей алмадым. Балапандар тірідей көмілді. Бұдан кейін ол жерге қайта бара алмадым. Бұл – нағыз күйзеліс болды», – дейді ол.
Оқиға қоғамда кең резонанс тудырды. Әлеуметтік желі қолданушылары Асқардың әрекетін адамгершіліктің үлгісі деп бағалап, оған қолдау білдіріп жатыр:
«Бүгін көрген ең жүрекке жылы видео. Оны жұмыстан шығармаңыздар!», «Қазіргі заманда мұндай жүрегі жұмсақ, мейірімді адам сирек. Бұл – үлкен адамгершілік.», «Мұндай адамдарға жалақы емес, сыйақы беру керек. Нағыз батыр!»
Кейбір қолданушылар қарлығаш киелі екенін еске салды.