RUS
SMARTNEWS.KZ басылымының хабарлауынша, кейбір аймақтарда ауа температурасы +40°C-тан асып кетті. Мұндай аптап елдердің қалалары мен инфрақұрылымдарына ауыр соққы болды.
Түркия: орман өрттері өршіп тұр
Ыстық пен құрғақшылық салдарынан Түркияда жүздеген орман өрті тіркелді. Өрт Измир облысындағы Чешме жағалауына жетіп, аймаққа ондаған өрт сөндіру ұшағы мен тікұшақ тартылды. Он мыңдаған тұрғын эвакуацияланды, өкінішке қарай, 81 жастағы ер адам қаза тапты.
Италия: асфальт еріп, адамдар көз жұма бастады
Италияның Денсаулық сақтау министрлігінің мәліметінше, елде 27 ірі қаланың 17-сінде аптап температура тіркелді. Кемінде бес адам ыстықтан көз жұмған.
Милан қаласында волонтерлер баспанасыз жандарға су мен азық-түлік таратып жатыр.
Больцано қаласында +37°C температура жиілеген. Жасыл желектің аздығы мен таулы рельеф ыстықты күшейтіп жіберген. Қаланың кей аудандарында асфальт еріп жатыр. Мамандар бұл мәселені шешу үшін жасыл желекті арттыру керек екенін айтады, алайда қала инфрақұрылымы (жерасты кабельдер мен жылу жүйелері) бұған кедергі келтіріп отыр.
Австрия: Зальцбургте салқын ауа іздеген турист көп
Зальцбург қаласында +38°C температура сақталып отыр. Туристер кондиционер мен желдеткіш бар ғимараттарға бас сауғалап, көлеңке іздеуде.
Мамандардың айтуынша, қалада +30°C-тан жоғары болатын күндер саны соңғы онжылдықта екі есеге артқан – жылына 10 күннен 20 күнге дейін көбейген.
Жылу мен құрғақшылық орман өрті қаупін де өсірді. Жоғарғы Австрияда бірнеше өрт оқиғасы тіркелген.
Швейцария: АЭС тоқтатылды
Аргау кантонындағы «Безнау» атом электр станциясы жартылай тоқтатылды. Бір реактор мүлде сөндіріліп, екіншісі тек 50% қуатпен жұмыс істеп тұр.
Оператор компания Axpo мұның себебі — реакторларды салқындатуға пайдаланылған судың Аар өзеніне қайта жіберілуі жергілікті флора мен фаунаға зиян тигізуі мүмкін екенін мәлімдеді. Қазірдің өзінде өзен суының температурасы тым жоғары.
Климаттық қауіптер күшейіп келеді
ЕО-ның Copernicus климат қызметінің мәліметінше, Еуропа — температура ең жылдам өсіп жатқан континент. 1980-жылдардан бері жер шары бойынша орташа температурадан екі есе жылдам көтеріліп жатыр.