RUS
SMARTNEWS.KZ басылымының хабарлауынша, АҚШ президенті Дональд Трамп бейсенбі күні UFC жекпе-жегін Ақ үй аумағында өткізуді жоспарлап отырғанын мәлімдеді. Бұл мәлімдеме ол келер жылы өтетін АҚШ-тың 250 жылдығына арналған іс-шараларды ресми түрде бастап берген кезде жасалды.
«Біздің барлық ұлттық саябақтар мен тарихи шайқас алаңдарында America 250 құрметіне арналған арнайы шаралар өтеді. Біз UFC жекпе-жегін — иә, тура Ақ үйдің аумағында! — өткізбекпіз», – деді Трамп Айова штатындағы жәрмеңке алаңында өткен салтанатты жиында.
Ақ үйдің баспасөз хатшысы Каролин Левитт президенттің бұл жоспары «нағыз байсалды ой» екенін растады. CNN-ге сұхбат берген UFC өкілі: «Біз Ақ үймен бұл шараны өткізу бойынша байланыстамыз», – дегенімен, әзірге қосымша мәлімет бере алмайтынын айтты.
Трамп пен Уайттың достығы
Трамп пен UFC арасындағы байланыс таңсық дүние емес. Президент пен ұйым басшысы Дэйна Уайттың достығы 2001 жылдан бері жалғасып келеді. Ол кезде UFC өз жекпе-жектеріне арена таба алмай қиналған тұста Трамп Atlantic City-дегі Trump Taj Mahal қонақүйінде турнир өткізуге рұқсат берген.
Содан бері Уайт Трамптың сенімді жақтасына айналды. Ол 2024 жылғы сайлау кезінде Трампты белсенді түрде қолдады, тіпті Республикалық ұлттық конгрессте президентті таныстырып шыққан болатын.
2025 жылдың өзінде Трамп бірнеше UFC іс-шарасына қатысып үлгерді. Сәуірде Майамиде өткен жекпе-жекте ол алғаш рет ресми түрде UFC «walkout» — яғни спортшылармен бірге аренаға шығу рәсіміне қатысты. Маусымда Ньюарк қаласында, қарашада Нью-Йоркте өткен турнирлерде де бой көрсетіп, жанкүйерлердің ерекше қошеметіне ие болды.
UFC, подкасттар және «жаңа еркектік» аудитория
Трамптың UFC-ге деген қызығушылығы кездейсоқ емес. Ол өз кампаниясында дене шынықтыру, дәстүрлі еркектік құндылықтар және еркін пікір білдіру алаңы саналатын подкасттар әлемімен жақсы үйлесті. Көптеген жас ер адамдар UFC-дің жанкүйері, ал бұл электорат Трамптың 2024 жылғы жеңісінде маңызды рөл атқарды.
Трамп өзін әрдайым «жауынгер» ретінде көрсетуге тырысып келді. UFC ареналарындағы қатысуы оның осы образын одан әрі нығайта түсті.
«Patriot Games» және басқа шаралар
250 жылдық мерейтой құрметіне тек UFC емес, басқа да спорттық іс-шаралар жоспарланған. Трамптың айтуынша, мектеп оқушылары арасында «Patriot Games» атты арнайы жарыс өткізіледі. Бұл бәсеке телеарна арқылы көрсетіліп, оны Денсаулық сақтау министрі Роберт Ф. Кеннеди басқаратын болады.
Жалпы алғанда, Ақ үйде UFC жекпе-жегі өтсе — бұл тарихи прецедент болмақ. Трамп мұны тек шоу үшін емес, өзінің «жауынгер» бейнесін бекіту және жас ерлердің қолдауын арттыру жолы ретінде де көріп отыр.