Путин шетелдіктерге Ресей әскер қатарына қосылуға ресми рұқсат берді

SMARTNEWS.KZ басылымының хабарлауынша, Ресей президенті Владимир Путин қол қойған жаңа жарлыққа сәйкес, енді шетел азаматтары тек төтенше жағдай немесе соғыс кезінде ғана емес, сонымен қатар әскерге шақыру кезеңінде де Ресей армиясының құрамына алынуы мүмкін. Бұл шешім Украинадағы әскери шығындарды өтеу және ел ішінде екінші мобилизацияны болдырмау мақсатында қабылданған.

Путиннің бұл жарлығы Ресейдің шетел азаматтарын әскери қызметке тарту саясатын заңды түрде кеңейтіп отыр. Бұған дейін шетелдіктер тек соғыс жағдайында ғана әскерге алынатын. Енді оларды кез келген шақырту кезеңінде де ресми түрде жұмылдыруға болады. Сонымен қатар Кремль жасы шектен асқан, бірақ тәжірибелі мамандардың Ресейдің барлау (СВР), қауіпсіздік (ФСБ) және басқа да арнайы қызметтермен келісімшартқа отыруына да мүмкіндік берді.

2022 жылдың қыркүйегінде жарияланған ішінара мобилизация жарлығы әлі де күшінде. Сол кезде 261 мыңнан астам ресейлік елден кетуге мәжбүр болды.

2025 жылдың көктемінде Кремль соңғы 14 жылдағы ең ірі әскерге шақыру науқанын жариялап, 160 мың адамды жинады. Бірақ әскерді шетелдіктермен толықтыру арқылы Кремль жаңа мобилизация жарияламай-ақ, әскер қатарын кеңейтуді көздеп отыр.

Британия Қорғаныс министрлігінің мәліметінше, 2023 жылғы сәуір мен 2024 жылғы мамыр аралығында Ресей армиясы 1500-ден астам шетелдік азаматты Украинаға қарсы соғысқа тартқан. Олардың басым бөлігі Оңтүстік және Шығыс Азиядан (771 адам), одан кейін бұрынғы КСРО елдерінен (523) және Африкадан (72) келген.

Рекруттардың көбі Мәскеу арқылы тартылып жатқан көрінеді — мұнда төленетін бонустар жоғары, әрі халықаралық қолжетімділік жеңіл.

Британ барлауы шетелдіктерді әскерге тартудың басты себептері ретінде ақшалай төлемдер мен Ресей азаматтығын алу мүмкіндігін атап өтті.

Алайда сарапшылар шетелдік рекруттардың ресейлік армияның жалпы құрамына айтарлықтай ықпал етпейтінін, бұл тек ішкі әскерге шақыру жүктемесін уақытша жеңілдетуге бағытталған шара екенін айтады.

Украина штабының дерегі бойынша, Ресей Украинаға басып кіргелі бері 1 028 610 әскери қызметкерінен айырылған (өлген және жараланған). Киевтің мәліметінше, Ресей күніне орта есеппен 1000 сарбазын жоғалтып отыр.