RUS
SMARTNEWS.KZ басылымының хабарлауынша, Азия чемпионы, пауэрлифтингтен әлем біріншілігінің жүлдегері Сергей Веселов Сауд Арабиясында тұтқындалды. Бұл ақпаратты алғаш болып «За нами уже выехали» телеграм-арнасы жария етті, кейінірек спортшының туыстары мен Қазақстан Сыртқы істер министрлігі де растады.
Спортшының әкесінің айтуынша, Сергей 19 маусымда Астанадан Ыстамбұл арқылы Сауд Арабиясына ұшқан. Алғашқы аптада туыстарымен тұрақты байланыста болған. Бірақ кейін байланыс үзіліп, жақындары өз бетінше іздеуге кіріскен.
«Қазір оның тірі екенін білеміз. Тергеу жүріп жатыр. Бірақ нақты қандай бап бойынша айыпталғаны және қайда қамауда отырғаны бізге айтылмай отыр. Сауд Арабиясының Медина қаласында екенін ғана консул хабарлады», – деді спортшының әкесі.
Қазақстан Сыртқы істер министрлігі де Сергей Веселовтың ұсталғанын растады. Ведомствоның айтуынша, ресми айып тағылған жоқ, дипломаттар оқиғаның мән-жайын анықтап жатыр.
«Құқық қорғау органдары қамауға алды. Қазіргі уақытта ол Медина қаласында. Қазіргі кезеңде тергеу амалдары жүріп жатыр», – делінген министрлік жауабында.
Сергей Веселов – пауэрлифтингтен Азия чемпионы, әлем чемпионатының жүлдегері, сондай-ақ Шығыс Қазақстан облысының бірнеше дүркін чемпионы. Оның не себепті ұсталғаны әзірге белгісіз.