RUS
SMARTNEWS.KZ басылымының хабарлауынша, Қостанайда inDrive такси қызметінің жүргізушісі жолаушы қызды күмәнді жерге апарып, марихуана шегуді ұсынған. Бұл туралы жәбірленуші қыздың өзі мәлімдеді.
Оның айтуынша, жүргізуші маршруттан ауытқып, көлікті жекеменшік секторға бұрып, жарықты өшіріп, есіктерді іштен жауып тастаған. Кейін ол қыздан есірткі туралы сұрап, қолына түтіндеткіш құрылғы мен марихуана салынған құтыны алған.
Қыз көліктен шығуға әрекеттенгенімен, есіктер ашылмаған. Сол сәтте анасы қоңырау шалып, айқайлағаннан кейін ғана жүргізуші қорқып, қызды межелі жерге жеткізген.
– Анам қоңырау шалып, айқайлай бастағанда ғана ол райынан қайтып, мені бастапқы бағытқа жеткізді. Кейін 102-ге хабарласып, жүргізушіні тексеруді сұрадық, – дейді жолаушы.
inDrive түсініктеме берді
inDrive компаниясы бұл оқиға туралы хабардар екенін және жәбірленушімен байланысқа шыққанын мәлімдеді.
«Жағдайдың жай-жапсарын білу үшін қызбен байланысқа шықтық. Оның жағдайын сұрап, барлық мәліметті нақтыладық. Бұл оқиға біздің ішкі ережелерге мүлдем сәйкес келмейді. Жүргізуші сервис ережесін бұзғаны үшін жүйеден біржола шығарылды», – деп хабарлады компания.
Сондай-ақ, компания құқық қорғау органдарымен ынтымақтасуға және қажетті ақпаратты беруге дайын екенін жеткізді.
