RUS
SMARTNEWS.KZ басылымының хабарлауынша, Дағыстанның Магарамкент ауданында су құбырынан ішкен жүздеген тұрғын ішек инфекциясынан жапа шегіп жатыр. 11 шілдедегі дерекке сүйенсек, 372 адам дәрігерлерге қаралған, олардың 91-і ауруханаға жатқызылған, көбі – балалар.
Ауру белгілері алғаш рет 7 шілдеде байқала бастаған. Жұқпалы дерттің негізгі себебі – ауызсу құбырындағы бактериялық ластану. Инфекция Магарамкент, Куйсун, Гиляр, Гапцах және Верхний Тагиркентауылдарының тұрғындары арасында тараған. Науқастарда гастроэнтерит (асқазан мен ішек қабынуы) диагнозы қойылған.
Дағыстан денсаулық сақтау министрлігінің мәліметінше, дәрігерлер үйлерді аралап, науқастарды анықтауда. Қазірдің өзінде 10 мыңнан астам тұрғын қамтылған. Сонымен қатар, гепатит А жұғу қаупіне байланысты вакцинация жүргізіліп жатыр.
Ал аймақтың ішкі істер органдары Каспийск пен Избербаш тұрғындарын қайнатылмаған суды ішпеуге шақырды. Себебі осы аймақтарға су Октябрь революциясы каналы (КОР) арқылы беріледі. Қазір каналда жөндеу жұмыстары жүріп жатыр, бірақ тұрғындардың айтуынша, жұмыс басталмаған, алаңда жұмысшылар жоқ.
Дағыстан ІІМ өкілі Гаяна Гариева да әлеуметтік желіде ескерту жасады:
«Краннан қайнатылмаған су ішпеңіздер! Бұл сіздің денсаулығыңызға қауіпті болуы мүмкін!», – деп жазды ол.
Қазіргі таңда бұл жағдайға байланысты РФ Қылмыстық кодексінің 238-бабы бойынша («Қауіпсіздік талаптарына сай келмейтін қызмет көрсету») қылмыстық іс қозғалды, коммуналдық қызметтердің заңға сәйкестігі тексерілуде.