RUS
SMARTNEWS.KZ басылымының хабарлауынша, Астанадағы атышулы қылмыстық іс — Перизат Қайрат пен оның анасы Ғайни Алашбаеваға қатысты сот процесі жалғасып жатыр. Оларға тағылған айып: қайырымдылыққа жиналған 3,5 млрд теңгені жымқыру.
Кезекті сот отырысында куәгер ретінде танымал блогер Олжас Садық жауап берді. Ол Газа секторына гуманитарлық көмек көрсету үшін халықтан 83,5 млн теңге жинап, соның бәрін Перизат Қайраттың қоры арқылы жөнелткенін айтты.
Блогердің сөзінше, қаражатты жинау былтырғы қазанның соңында басталған. Ол досы, блогер Назим Мисановпен бірігіп Instagram-да видео жариялап, жұртты көмек көрсетуге үндеген. Видеоны миллиондаған адам көргеннен кейін, Садықтың жеке картасына ірі сома түскен.
Бастапқыда ол бұл қаржыны ЮНИСЕФ арқылы аудармақ болған. Бірақ көп ұзамай Перизат Қайрат байланысқа шығып, гуманитарлық көмек жөніндегі «қызу жұмыс» барысын көрсеткен. Палестина елшілігімен тікелей жұмыс істейміз деген уәжінен кейін Олжас Садық сеніп қалып, ақшаны аударған.
Кейін олар Әбу-Дәбиге бірге барып, гуманитарлық қоймаларға кіріп шыққан. Садықтың айтуынша, барлық шығынды Перизат Қайрат өзі көтерген. Алайда Қазақстанға оралған соң, блогер көмектің қайда кеткенін дәлелдейтін құжаттарды бірнеше рет сұрағанымен, ешқандай жауап ала алмаған.
Блогер сотта «Енді барынша ресми арна — ЮНИСЕФ арқылы жұмысты жалғастырамын» деп мәлімдеді.