RUS
SMARTNEWS.KZ басылымының хабарлауынша, 15 шілдеден бастап Латвия Ресей азаматтарының небиометриялық шетелдік паспорттарын мойындамайды. Бұл шектеу елге кіру мүмкіндігін шектеп қана қоймай, виза мен тұруға рұқсат алуға да тосқауыл болмақ.
Латвия Сыртқы істер министрлігінің хабарлауынша, енді Ресей азаматтары Латвия аумағына тек биометриялық паспортпен ғана өте алады. Бұдан бөлек, ескі үлгідегі құжат иелеріне виза берілмейді, тұруға ықтиярхат алуға өтініш те қабылданбайды.
Елде ұзақ мерзімді виза немесе ықтиярхатпен жүрген ресейліктерге биометриялық паспорт рәсімдеуге алты ай уақыт беріледі.
Айта кетейік, мұндай шектеуді бұған дейін Литва да енгізген. 1 маусымнан бастап бұл ел ресейлік ескі паспорттарды жарамсыз деп танып, Калининград арқылы транзитпен өтетіндерден басқасына елге кіруге тыйым салды.
Сонымен қатар, Дания, Чехия, Эстония, Франция және Исландия елдері де ресейліктердің небиометриялық құжаттарын қабылдамайтынын мәлімдеген.
Литва СІМ бұл шешім Еуроодақтағы ортақ ұстаныммен үндесетінін атап өтті.