RUS
SMARTNEWS.KZ басылымының хабарлауынша, Қазақстан акушерлік және гинекология саласының іргетасын қалаушылардың бірі, медицина ғылымдарының докторы, профессор, қоғам қайраткері Нина Әмірқызы Қаюпова 88 жасында дүниеден озды. Бұл туралы С.Асфендияров атындағы Қазақ ұлттық медицина университетінің баспасөз қызметі хабарлады.
Нина Қаюпова 1936 жылы 1 мамырда Шығыс Қазақстан облысы, Зайсан қаласында дүниеге келген. Ол 60 жылдан астам ғұмырын әйелдер денсаулығын қорғауға арнады. Медицинада еңбек ете жүріп:
30 мыңнан аса сәбидің дүниеге келуіне көмектесті;
25 доктор, 40 ғылым кандидатын дайындады;
19 монография мен 400-ден астам ғылыми мақала жазды.
Ол Қазақ ғылыми-зерттеу акушерлік және гинекология институтында, Республикалық ана мен бала денсаулығын қорғау орталығында жұмыс істеп, 15 жыл бойы КазНМУ-да дәріс оқыды. Соңғы жылдары еліміздің жетекші ғалымы әрі салалық ғылыми журналдың бас редакторы болды.
Нина Әмірқызының бастамасымен экологиялық репродуктология атты жаңа бағыт қалыптасты. Ол БҰҰ секілді беделді халықаралық конференцияларға қатысып, Қазақстан атынан сөз сөйледі. Сонымен қатар, Жоғарғы Кеңес пен Сенат депутаты, әйелдер кеңесінің жетекшісі, акушер-гинекологтар ұлттық қауымдастығының төрайымы болды.
Ерен еңбегі үшін ол "Парасат" орденімен, "Достық" ІІ дәрежелі орденімен, мемлекеттік марапаттармен, Бейбітшілік пен рухани келісім мемлекеттік сыйлығымен марапатталған.
Алматы қаласының Құрметті азаматы атанған.
Нина Қаюповаға қоштасу рәсімі 16 шілде күні, сағат 10:00-де Алматыдағы Concordia театрында өтеді.