RUS
SMARTNEWS.KZ басылымының хабарлауынша, Мемлекет басшысы Қасым-Жомарт Тоқаев Жоғары аудиторлық палатаның төрағасы Әлихан Смайыловты қабылдады. Кездесуде 2025 жылдың алғашқы жарты жылдығында жүргізілген мемлекеттік аудиттің нәтижелері таныстырылды, деп хабарлайды Ақорда.
Биылғы алты айда жалпы сомасы 20 триллион теңгені қамтитын 12 мемлекеттік аудит жүргізілген. Бұл көрсеткіш өткен жылдың сәйкес кезеңімен салыстырғанда 7,1 есе көп. Аудит аясында білім беру, денсаулық сақтау, цифрлық даму, энергетика және жоғары спорт салаларындағы қаржы жұмсау тиімділігі тексерілді.
Тексеріс нәтижесінде 60-тан астам ұсыным мен 450-ге жуық міндетті орындау пункті әзірленіп, Үкімет пен тиісті мекемелерге жолданды. Сонымен қатар, 20 дерек құқық қорғау органдарына берілді.
Әлихан Смайылов Жоғары аудиторлық палатаның бастамасымен қолға алынған заңнамалық өзгерістер туралы да баяндады. Соның бірі – бұл органның бюджеттен тыс қорларды да тексеруге мүмкіндік алуы. Сондай-ақ Ұлттық қор қаражатына мониторинг жүргізетін комиссияның жұмысы қайта құрылып, оның тиімділігі мен ашықтығын арттыру көзделіп отыр.
Талқыланған маңызды бастамалардың қатарында: жылу беру маусымына дайындықты дұрыс жүргізбеген мекеме басшыларының жауапкершілігін күшейту, сондай-ақ тауарлық газдың бөлшек бағасына мемлекеттік бақылауды барлық нарық субъектілеріне тарату бар.
Қасым-Жомарт Тоқаев мемлекеттік аудит жүйесін кезең-кезеңімен жетілдіруді тапсырды. Ол бақылаудың тиімділігі мен ашықтығын арттыру үшін цифрлық технологияларды белсенді енгізу қажет екенін айтты. Сонымен қатар, бюджет қаражатының мақсатсыз жұмсалуын азайтып, ұлттық ресурстардың тиімді пайдаланылуын қамтамасыз ету маңызды екенін атап өтті.