RUS
SMARTNEWS.KZ басылымының хабарлауынша, екінші дүниежүзілік соғыс кезінде қаза тапқан қазақстандық әскери ұшқыштың сүйегі 80 жылдан соң табылды. Бұл туралы «Новый Калининград» басылымы жазды.
2025 жылғы шілденің ортасында Ресейдің Калининград облысындағы «Совесть» іздеу жасағы 1945 жылдың 4 наурызында әуеде атып түсірілген Ил-2 штурмовигінің қалдықтарын тапты. Әуе шайқасы Шығыс Пруссия аумағында болған.
Ұшақ ішінен екі экипаж мүшесінің — ұшқыш Павел Смирнов пен борт атқыш Жолдаш Жандаровтың (мақалада "Юлдаш Жандаров" деп көрсетілген) сүйектері табылған. Жандаров — қазіргі Түркістан облысы, Созақ ауданының тумасы.
Мәлімет бойынша, Смирнов пен Жандаров 136-гвардиялық шабуылдаушы авиация полкінің құрамында болған. 1945 жылы олар жауынгерлік тапсырма орындау кезінде, 12 неміс жойғышымен шайқасқа түскен 17 кеңес ұшағының екеуі атып түсірілген сәтте қаза тапқан.
Айта кетейік, ұшқыштардың жеке заттарының кейбірі — соның ішінде комсомол билеті мен Жандаровтың Қызыл Армия жауынгері куәлігі — 1980-жылдары-ақ табылған еді. Алайда тек 2025 жылдың шілдесінде олардың сүйектерін толықтай жерден қазып алу мүмкін болды.