RUS
SMARTNEWS.KZ басылымының хабарлауынша, Атырауда шілде басында балалар жаппай уланған жекеменшік бассейннің иесі үйқамаққа алынды. Бұл туралы облыстық прокуратура хабарлады.
«Күдіктіге қатысты бұлтартпау шарасы ретінде үйқамақ қолданылды», — делінген ресми мәліметте.
Оқиға қаладағы танымал демалыс орындарының бірінде болған. Денсаулық сақтау басқармасының дерегінше, бассейнде шомылғаннан кейін 15-тен астам адам уланып, оның ішінде 13-і — бала. Үшеуі ауыр жағдайда жансақтау бөліміне түскен.
Куәгерлердің айтуынша, бассейн ішіндегі хлор иісі кенет күшейіп, су түсі өзгерген. Сол сәтте балалар жөтеліп, есінен танып, талып құлаған. Қорыққан ата-аналар шұғыл түрде балаларын шығарып, жедел жәрдем шақырған.
Алдын ала болжам бойынша, улануға хлор реагенттерін мөлшерден тыс қолдану себеп болуы мүмкін. Нысан иесі техникалық ақау болғанын мойындады. Оқиғадан кейін бассейн уақытша жабылып, прокуратура мен төтенше жағдайлар қызметі тексеріс бастаған.
Тергеу жалғасуда. Ол аяқталғанға дейін аквапарк басшысы үйқамақта болады.