15 жасынан бері ұйқыда жатқан Сауд Арабиясының ханзадасы 20 жылдан соң қайтыс болды
«Ұйқыдағы ханзада» атанған Әл-Уәлид жер қойнына тапсырылды.
SMARTNEWS.KZ басылымының хабарлауынша, Сауд Арабиясының ханзадасы, көпшілік арасында «ұйқыдағы ханзада» деп аталып кеткен Әл-Уәлид бин Халид Әл Сауд 20 жылдан астам уақыт комада жатқан соң 36 жасында қайтыс болды.
Ол 2005 жылы Лондонда болған жол апатынан кейін ес-түссіз күйге түскен. Сол кезде небәрі 15 жастағы ханзада әскери колледжде білім алып жүрген. Апат салдарынан ол ауыр бас-ми жарақатын алған.
Осы уақыт ішінде Әл-Уәлид Эр-Риядтағы ауруханада аппаратқа қосылып жатты. Дәрігерлер оның жағдайының оңалу мүмкіндігі жоқ екенін айтып, жасанды өмірді тоқтатуға кеңес берген. Алайда оның әкесі, ханзада Халед бин Талал ұлын аппараттан ажыратуға үзілді-кесілді қарсы болған және үмітін үзбей келген.
Ханзаданың қайтыс болғанын да әкесі өзі хабарлады. Ол әлеуметтік желідегі парақшасында:
«Алланың жазмышына сенген жүрекпен, терең қайғы мен күйзеліс ішінде сүйікті ұлымыз — Әл-Уәлид бин Халид бин Талал бин Әбдел Әзиз Әл Саудтың бұл дүниеден өткенін естіртеміз. Алла оны рақымына алғай!» — деп жазды.
Материал авторы
