RUS
SMARTNEWS.KZ басылымының хабарлауынша, ауыр атлетикадан Рио Олимпиадасының күміс жүлдегері Жазира Жаппарқұл ұлттық құрамадағы әділетсіздік туралы ашық айтты. Оның сөзінше, шетелден келген легионерлер қазақстандық спортшылардан әлдеқайда көп жалақы алған. Бұл туралы ол Ақырыс Сейтқазының Youtube-арнасына берген сұхбатында айтқан.
«Мен спортта жүрген кезде өз елімізде туған спортшылар емес, шетелден келгендерге басымдық берілетін. Әрине, олар да адам, ақша табуы керек, отбасы бар. Бірақ біздің ауылдың балалары қара нанмен өскен, спортқа жанын салып келеді. Сонда да жалақы жағынан біз олардан төмен тұрдық», - дейді спортшы.
Ол Олимпиададан елге медаль әкелсе де, жоғары жалақы алмағанын айтады. Керісінше, басшылар қаржы тапшылығын алға тартып, келісілген ақшаны да толық төлемеген.
«Жыл басында 400 мың теңге жалақымен келісімшарт жасадым. Бірақ мамырдан кейін бұл сома екі есеге қысқарып, тек 200 мың теңге ғана алатын болдым. Себебі ақша жоқ деді. Кейін бапкер болғанда алған алғашқы жалақым 85 мың теңге ғана болды», - дейді Жазира Жаппарқұл.
Айта кетейік, Жазира Жаппарқұл - Олимпиада ойындарында жүлде алған алғашқы қазақ қызы. Ол 2016 жылы Рио-де-Жанейрода өткен Олимпиадада ауыр атлетикадан күміс жүлде жеңіп алған болатын.