RUS
SMARTNEWS.KZ басылымының хабарлауынша, АҚШ-тың басқа елдерге қарсы енгізген жаңа кедендік баж салығы Ресейден келетін тыңайтқыш көлемінің күрт артуына себеп болды. The Washington Post мәліметінше, Ресейден АҚШ-қа карбамид жеткізілімі екі есеге өскен. Бұл зат — бидай, жүгері мен күріш өсіруге кеңінен қолданылатын азотты тыңайтқыш.
Басылымның жазуынша, 2025 жылғы мамырда Ресейден импортталған карбамид АҚШ нарығындағы тыңайтқыш импортының 64 пайызына дейін жеткен. Бұған дейін бұл көрсеткіш екі есе төмен болған.
Тыңайтқыш импортының мұндай өзгеруіне АҚШ президенті Дональд Трамптың Катар мен Алжир секілді экспорттаушы елдерге қарсы енгізген баж салығы себеп болды. Ол сәуір айының басында 185 ел мен аймақтан келетін бірқатар тауарларға тариф енгізілетінін мәлімдеген еді.
Аталған шешімнің күшіне енуі 9 шілдеге, кейін 1 тамызға шегерілгенімен, сәуірден бастап 10 пайыздық бастапқы баж салығы күшіне енген. Соның салдарынан АҚШ-қа тыңайтқыш жеткізуде Ресей басты серіктеске айналды.