RUS
SMARTNEWS.KZ басылымының хабарлауынша, Атырау қаласындағы Исатай-Махамбет орталық алаңында бес жасар Әлихан Меңдібай жаңа орнатылған ойын алаңында ойнап жүріп, ауыр жарақат алды.
Бала темір қоршауға соғылып, басынан қатты жарақат алып, ауруханаға жеткізілген. Дәрігерлер оның басына бірнеше тігіс салған.
Алиханның анасы Ақерке Алдиярова болған жайтты айтып берді:
«Отбасымызбен серуенге шықтық. Субұрқақ жанындағы жаңа ойын алаңына кірдік. Ол жерде балалармен қатар үлкен қыздар да тербетіліп ойнап жүрді. Ұлым бізден бұрын жүгіріп өтіп бара жатқан. Тербетілмелі әткеншектердің жанынан өтпек болғанда, темірге басымен соғылып құлады. Қатты соққы болды – басынан қан сорғалады», – дейді анасы.
Оның айтуынша, оқиғадан кейін бала күйзеліске түсіп, жиі жылайды.
«Ойын алаңына темір қоршау қойып не керек? Бұл – балалар ойнайтын қауіпсіз орын болуы керек қой. Ал олар мені неге қарамадың деп айыптап жатыр», – дейді Ақерке.
Алайда ата-ананың шағымына жауап берген қала әкімдігі алаңның барлық құрылыс және техникалық талаптарға сай екенін мәлімдеді. Олар нысанның пайдалануға берілер алдында тиісті органдардың тексеруінен өткенін алға тартады.
«Оқиғаның орын алуына баланың қараусыз қалуы себеп болды. ҚР заңнамасына сәйкес, кәмелетке толмағандардың өмірі мен денсаулығы үшін ата-аналар немесе олардың заңды өкілдері толық жауап береді», – делінген әкімдік таратқан ресми хабарламада.
Бұдан бөлек, жергілікті билік өкілдері ата-аналарды қоғамдық орындарда балаларын қараусыз қалдырмауға шақырды.