RUS
SMARTNEWS.KZ басылымының хабарлауынша, Жетісай ауданында 4 миллиард теңге бюджет қаржысын жымқырған іс бойынша 46 адам қылмыстық жауапкершілікке тартылды.
Түркістан облысының мамандандырылған қылмыстық істер жөніндегі сотында алқабилердің қатысуымен өткен процесте Жетісай аудандық білім бөлімінің екі лауазымды тұлғасы мен 44 мектеп есепшілеріне қатысты іс қаралды. Бұл туралы соттың баспасөз қызметі жеткізді.
Іс материалдарына сәйкес, 2021–2023 жылдар аралығында білім бөлімінің қызметкерлері бірлесіп, бюджет қаржысын заңсыз иемденген. Олар мектепте жұмыс істемеген адамдардың атына жалақы аудару арқылы мемлекетке 4 миллиард теңгеден астам шығын келтірген.
Айыпталушылардың ішінде М. мен Ш. кінәсін мойындамаған. Ал 43 бухгалтер мемлекетке жалпы сомасы 800 миллион теңге көлеміндегі қаражатты қайтарып берген.
Алқабилердің үкімі бойынша:
Ш. мен М. 9 және 10 жылға бас бостандығынан айырылды. Ш.-ға қатысты жаза 5 жылға кейінге шегерілді, себебі оның жас балалары бар. Тағы 2 адамның әрекеті қайта сараланып, 1 жылға бостандығын шектеу жазасы тағайындалды.
34 адам 5 жылдан 8 жылға дейін түрмеге кесілді.
8 адамға 1 жылдан 3 жылға дейін бостандығын шектеу жазасы берілді.
Шығынды қайтару мәселесі азаматтық іс жүргізу тәртібімен қаралатын болды.