Адвокат Мейірман Шекеев Нұрғанаттың өліміне қатысты істе күдікті жайттар қараусыз қалғанын айтты
Адвокат Нұрғанат қайтыс болған күні дәрігердің Қаржаубай отбасын қаралайтын бейнежазба жариялағанын айтты.
SMARTNEWS.KZ басылымының хабарлауынша, Шерзат Полаттың ісін зерттеген адвокат Мейірман Шекеев марқұм Нұрқанат Ғайыпбаевтың өліміне байланысты жаңа мәліметтермен бөлісті. Ол істердің толық тексерілмегенін және бірнеше күдікті жайттың назардан тыс қалғанын мәлімдеді.
— Нұрқанаттың анасының айтуынша, дәл сол күні дәрігер Бауыржан Абдрахманов Қаржаубай отбасына қатысты бейнежазба жариялаған. Ал Жұмабике ханым жәбірленуші ретінде дәрігердің жауапқа тартылуын талап еткен. Алайда ол арыз толық қаралмай, аяқсыз қалған, – деп жазды адвокат.
Мейірман Шекеевтің сөзінше, бұл іс Қылмыстық-процессуалдық кодекстің 24-бабына сәйкес жан-жақты тексерілмеген.
Бұған дейін марқұмның әпкесі Перизат Нұрымова болса, Нұрқанаттың өлім алдындағы хатына сенбейтінін айтқан.
— Ол мені «әпке» деп айтпайтын, досындай көретін. Ал хатта «Әпке, сен маған демеу болдың» деген ұзақ жазба бар. Бірақ ол ондай көлемде ешқашан жазба жазбайтын. Бізде байланыс жақсы дамыған: видеоқоңырау, аудиожазба, бәрі бар. Ал бұл жолы – жазбаша хат, өте ұзақ, – дейді Перизат.
Оның сөзінше, Нұрқанат 5 ағайындының тек төртеуіне ғана хат жолдаған. Бұл да күдік туғызады.
— Ол менің сіңілімді қатты жақсы көретін. Қалайша дәл сол қарындасына хат жазбай кетеді? Меніңше, бұл хатты жазған адам отбасының толық құрамын білмеген. Демек, ол басқа біреу болуы мүмкін, – дейді марқұмның әпкесі.
Жасөспірім Шерзат Полаттың өлімі қоғамды дүр сілкіндірген еді. Бұл оқиғадан кейін екі ай өтпей жатып, ағасы Нұрқанат Ғайыпбаев та жұмбақ жағдайда көз жұмған. Оқиғаға байланысты тергеу әлі жалғасып жатыр.
Материал авторы
