RUS
SMARTNEWS.KZ басылымының хабарлауынша, Перизат Қайрат пен оның анасы Ғайни Алашбаеваның ісі бойынша өтіп жатқан сотта прокурор Арман Кезекен тәркіленген қымбат бұйымдардың жалпы құнын жария етті.
Айыптау тарапының мәліметінше, сотталушылардан алынған брендтік сөмкелер, аяқкиімдер мен әшекей бұйымдардың саны – 140, ал олардың жалпы құны – 158 миллион 289 мың 365 теңге. Бұл заттар қайырымдылық көмек көрсету сылтауымен жиналған қаражатқа сатып алынған.
Прокурор Ғайни Алашбаеваның позициясына жеке тоқталды. Ол сотта жауап беруден бас тартқанымен, тергеу барысында және іс материалдары арқылы көзқарасы анық көрініс тапқанын атап өтті.
«Ол өзін кінәсіз деп есептейді. Қызы Перизат Қайраттың әрекеттеріне еш қатысы жоғын айтты. Бірақ Қайрат Перизаттың телефонынан 20 мың теңгелік купюралармен толтырылған чемодан бейнеленген видео табылды. Бейнежазбада: «Не айтуға болады? Ең керемет жыл. Аллаға шүкір», — деген сөздер айтылады», — деді прокурор Арман Кезекен.
Бұған дейін мемлекеттік айыптаушы тарап Перизат Қайрат пен оның анасына қандай жаза қолдануды сұрағанын мәлім еткен болатын. Сонымен қатар, прокурорлар Перизат Қайраттың анасына қатысты бұлтартпау шарасын өзгертуге ұсыныс жасаған.
Айта кетейік, кешегі сот отырысы жабық режимде өтті. Бұған істің ішінде банк құпиясын қамтитын құжаттар мен құпия деректердің қаралуы себеп болған. Соттың баспасөз қызметі мәлімдегендей, күннің алғашқы жартысында заттай айғақтар зерттеліп, бірқатар өтініштер қаралды. Сондай-ақ, сотта Перизат Қайраттан жауап алынған. Ал анасы — Ғайни Алашбаева жауап беруден бас тартты.