«37 млнға машина, 10 млнға қыдыру»: Перизат Қайраттың анасынан табылған «шығыс жоспары» әшкере болды

SMARTNEWS.KZ басылымының хабарлауынша, сотта Перизат Қайраттың анасы Ғайни Алашбаеваның телефонынан табылған ақша жұмсау жоспары жария етілді. Прокурордың айтуынша, ол онда 37 миллион теңгеге көлік, 10 миллион теңгеге қыдыру, 3 миллион теңгеге БАД ішу секілді жоспарларын жазып қойған.

Бүгін өткен жарыссөз барысында мемлекеттік айыптаушы Арман Қызыкен Алашбаеваның телефонынан табылған 2023 жылдың 16 тамызында жазылған жазбаны сөзбе-сөз оқып берді.

«Жазбада былай делінген: 37 млн теңге – машина, 5 млн – тіс емдеу, 10 млн – Түркияда емделу, 3 млн – БАД ішу, 10 млн – қыдыру, 3 млн – фэншуй, 1 млн – бадзы оқу, 2 млн – офлайн шараларға бару, 3 млн – киім, 3 млн – білезік, ақ алтын бриллиант», — деді прокурор.

Айыптау тарапының мәлімдеуінше, Перизат Қайрат бұл қаражаттың қайдан келгенін дәлелдей алмаған. Соттың жабық отырыстарында ол тек Астана мен БАӘ-де пәтер сатқанын айтып, ауызша түсініктеме берген. Алайда, бұл сөздері ресми құжаттармен расталмаған.

Мемлекеттік айыптаушылар соттан Перизат Қайратты 10 жылға, ал анасы Ғайни Алашбаеваны 8 жылға бас бостандығынан айыруды сұрады.