RUS
SMARTNEWS.KZ басылымының хабарлауынша, Қарағандыда 22 жастағы кәсіпкер Алика Мұхамадиева әлеуметтік желідегі арандатушы пікірлері үшін екі айға қамауға алынды. Енді оған ұлтаралық араздықты қоздырды деген айып тағылып отыр.
Полиция мәліметінше, Алика Threads әлеуметтік желісінде қоғамда дау тудырған жазба жариялаған. Бұл жазбада ұлтаралық араздық белгілері болғаны анықталған. Пайдаланушылар оның сөзіне наразылық танытып, әлеуметтік желіде қызу пікірталас туғызған. Кейбіреулер тіпті қоқан-лоқы көрсеткен.
Кейінірек Алика желіде кешірім сұрап, бейнежазба жариялады. Алайда бұл жеткіліксіз деп танылды.
Қарағанды облыстық Полиция департаменті аталған факт бойынша Қылмыстық кодекстің 174-бабы 1-бөлігі бойынша (ұлтаралық араздықты қоздыру) қылмыстық іс қозғалғанын мәлімдеді.
«Тергеу барысында 22 жастағы қарағандылық тұрғын Threads желісінде ұлтаралық араздық белгілері бар жазба жариялағаны анықталды. Сонымен қатар, күдіктінің елден тыс жерге кетуді жоспарлап жатқаны белгілі болды. Осыған байланысты тергеу органдары тарапынан бұлтартпау шарасы ретінде қамауға алу туралы өтініш жасалды», – деді полиция өкілдері.
2025 жылдың 22 шілдесінде Қарағанды соты тергеу өтінішін қанағаттандырып, Алика Мұхамадиеваны екі ай мерзімге қамауға алу туралы шешім шығарды.
Қазіргі таңда сотқа дейінгі тергеу жалғасып жатыр, тиісті сараптамалар тағайындалған. Тергеу қорытындысы бойынша процессуалдық шешім қабылданатын болады.
Алика Мұхамадиева — Қарағандыда Қытайдан тауар жеткізу қызметімен айналысатын кәсіпкер. Сонымен қатар, оның киім және аксессуарлар дүкені бар.