RUS
SMARTNEWS.KZ басылымының хабарлауынша, 22 шілдеде Қырғызстанның Чолпон-Ата қаласында өткен «Мейкин Азия» IV халықаралық музыка фестивалінің жабылу салтанатында қазақстандық әнші, композитор Димаш Құдайбергенге ерекше марапат табысталды. Бұл туралы dimashnews.com жазды.
Қырғыз Республикасы Президенті Садыр Жапаровтың жарлығымен Димашқа «Қырғыз Республикасының халық әртісі» құрметті атағы берілді. Бұл марапатты әншіге Қырғызстанның мемлекеттік хатшысы Марат Иманқұлов пен мәдениет, ақпарат және жастар саясаты министрі Мирбек Мәмбеталиев салтанатты түрде табыс етті.
Фестиваль аясында өнер көрсеткен Димаш тағы бір мәрте көрерменнің зор қошеметіне ие болды. Ол бұған дейін әлеуметтік желіде ерекше стильдегі суреттері мен бейнежазбаларын жариялап, тыңдармандарын қызықтырып қойған еді.
Айта кетейік, «Мейкин Азия» фестивалі – Орталық Азиядағы ең ауқымды мәдени шаралардың бірі. Биылғы финал Дүниежүзілік көшпенділер ойындарының орталық ипподромында өтті.