RUS
SMARTNEWS.KZ басылымының хабарлауынша, соңғы тәулікте Израиль блокадасындағы Газа секторында аштық пен ауыр тағам жетіспеушілігінен тағы 15 адам көз жұмды. Қаза тапқандардың төртеуі – балалар. Бұл туралы Газа секторындағы денсаулық сақтау министрлігі жазды.
Министрлік мәліметінше, 2023 жылғы 7 қазанда Израильдің жаппай шабуылдары басталғалы бері аштық пен тамақ жетіспеушілігінен қайтыс болғандар саны 101 адамға жеткен. Олардың 80-і – балалар.
Газа секторы қазір ауыр гуманитарлық апатты бастан өткеріп отыр. Израиль енгізген қатаң блокада гуманитарлық көмектің кіруіне кедергі келтіріп, халықты аштық пен шөлге ұрындырды. Аймақта су, дәрі-дәрмек, медициналық құралдар мен гигиеналық заттар өте қажет.
Көптеген халықаралық және жергілікті ұйымдар Израильді аштық пен шөлді соғыс құралы ретінде қолданып отыр деп айыптауда.
Израиль армиясы Газа секторының азаматтық инфрақұрылымының шамамен 88%-ын жойған. Сонымен қатар, баспаналарын тастап кетуге мәжбүр болған бейбіт тұрғындарға қарсы соққылар жалғасып жатыр.
Қазіргі таңда Газада шамамен 2,3 миллион адам тұрады. Олардың 2 миллионы өз үйлерін тастап кетуге мәжбүр болған, көпшілігі бірнеше рет орын ауыстырған. Халықтың басым бөлігі шатырларда немесе адамға лық толы мектептерде өмір сүруде. Бұл жерлерде санитарлық жағдай өте төмен, нәтижесінде түрлі жұқпалы аурулар тарап жатыр.
Израиль әскері күн сайын босқындар орналасқан шатырларға және бейбіт азаматтар тығылған нысандарға соққы беруді жалғастыруда. 2023 жылдың 7 қазанынан бері Газа секторындағы қақтығыстардан кем дегенде 59 029 палестиналық қаза тапты, 142 135-тен астам адам жараланды.