RUS
SMARTNEWS.KZ басылымының хабарлауынша, Батыс Қазақстан облысында салынуы тиіс цемент зауытының құрылысына жергілікті билік тосқауыл қойған. Инвестор мен шенеуніктер арасындағы дауға прокуратура араласуға мәжбүр болды.
Ресми мәліметке сәйкес, «СпецСтройСервис» ЖШС 2022 жылдан бері жаңа кәсіпорын салу жобасын жүзеге асырып келеді. Жоба шеңберінде 60 жаңа жұмыс орны құрылып, жалпы инвестиция көлемі 75 миллиард теңгені құрайды. Қаржыландыруға қытайлық инвесторлар тартылған.
Алайда компания мен облыстық жер қатынастары басқармасы арасында келіспеушілік туындаған. Шенеуніктер кәсіпорынды жер телімін жалға алу келісімшартын бұзуға мәжбүрлеу үшін сотқа жүгінген. Бұл учаскеде инвестор зауыт жұмысына қажетті шикізатты өндіріп жатқан.
Даулы жағдайға облыстық прокуратура араласып, барлық мүдделі тараптармен фронт-офис алаңында кездесу өткізді. Прокурорлар шенеуніктерді талап-арыздан бас тартуға көндірген. Алайда кейінірек басқарма жалға алу келісімін біржақты бұзып, өз шешімін сотта қорғап шыққан.
Бірақ бұл жолы да прокуратура қарап қалмай, сот шешіміне шағым түсіріп, оны жоққа шығаруға қол жеткізді.
«Қабылданған шаралардың нәтижесінде инвестор қытайлық серіктеспен 100 миллион долларлық келісімшартқа қол қойып, зауыт құрылысын жалғастырды», — деп хабарлады облыстық прокуратура.
Айта кетейік, бұл Қазақстанда қытайлық инвестициямен салынып жатқан жекелеген цемент зауыты емес. Бұған дейін Алматы облысында Қытай қаржыландырып жатқан зауыттың көне петроглифтер мен тарихи қорымдарға тым жақын орналасуы да қоғамда дау туғызған болатын.